شوف تفرج آه يا سلام - عمر الزعني .

عمر الزعني- شوف تفرج آه يا سلام


شوف تفرج آه يا سلام
شوف احوالك بالتمام
شوف قدامك عجايب
شوف قدامك غرايب
يا حبيبي لو بتشوف
شوف أحوالك عالمكشوف
شوف جبال شوف وديان
سوريا وجبل لبنان
كانت قطعة من الجنان
اما اليوم يا حسره
الارض حفره ونفره
ما فيها عشبة خضرا
يا حفيظ يا أمين من غدرات الزمان
الفلاح شلح التبان
عاف السكة والفدان
وراح تعين عند فلان
مغرور بحب الالقاب
وما حسب للعزل حساب
كان سلطان صار بواب
يا حفيظ يا أمين من غدرات الزمان
صار مأمور ما له صوت
عايش من قلت الموت
شحاد ولابس ردنكوت
عرق جبينك بفيدك
وعزة نفسك بتزيدك
واشرف من مدة ايدك
يا حفيظ ياأمين من غدرات الزمان
بتركض بتركض عالتسعة
بتشد وبتكد وبتسعى
بينوبك واحد من تسعة
العصفور بيتسلى
بيسرح بيمرح بيتفلى
يا حفيظ يا أمين من غدرات الزمان
بعشره فول وبخمسة زيت
كنت تعشي أهل البيت
اما هالايام يا ريت
ليرة واتنين مابيكفيك
يا محلا يوم المتليك
والسحتوت ونحاسه ديك
يا حفيظ الخ….
شوف النا عما تبكي
واللي ما بيبكي بيشكي
واللي ما بيشكي بيحكي
مرضك عنك لا تخفيه
وان كنت شاطر داويه
دود الخل منو وفيه
يا حفيظ يا أمين من غدرات الزمان
كلها يوم يومين بتهون
وبيطلع ورق الليمون
وبسقيك بالوعد يا كمون
بين ما تطلع ها الاوراق
ويجي الترياق من العراق
بيكون العليل فارق
يا حفيظ يا أمين الخ
شوف ملوك بني عثمان
كانوا ملوك على الزمان
ناموا ع مخدة أمان
علوا ناس وطوا ناس
طرفه عمرو ما انداس
كانوا ملوك صاروا ناس
يا حفيظ يا أمين الخ….
والدنيا صندوق فرجه
لا تغرك منها البهجه
من يوم ما خلقت عوجه
لا تبكي عليها وتتوح
ما بتحرز ما فيها روح
تفرج بعينك وروح
يا حفيظ يا أمين من غدرات الزمان